Հայաստանում ակադեմիական քաղաքի կառուցման գլխավոր հատակագիծը կկազմի գերմանական GMP International Architects and Engineers ընկերությունը:
Այս մասին հարցն ընդգրկված էր և հավանության արժանացավ Կառավարության այսօրվա նիստի չզեկուցվող հարցերի օրակարգում։
Աշխատանքները կատարելիս ընկերությունը կհամագործակցի ճարտարապետության և շինարարության Հայաստանի ազգային համալսարանի հետ, որը գերմանացի գործընկերներին կտրամադրի բոլոր ելակետային տվյալները: Բացի այդ, նախագծային աշխատանքների իրականացման մեջ կներգրավվեն համալսարանի ուսանողները:
Պայմանագրի գումարի չափը որոշման մեջ չկա, սակայն նշվում է, որ ֆինանսավորումը կիրականացվի «գիտական կենտրոնների վերանորոգում» բյուջետային հոդվածի շրջանակներում, որի ընդհանուր ծավալը կազմում է 940 մլն դրամ:
Ներկայացված նածագծի հիմնավորման մեջ նշվում է՝ «Ակադեմիական քաղաք» ծրագիրի համար համապատասխան ենթակառուցվածքների և բնական միջավայրի ստեղծման նպատակով առաջացել է գլխավոր հատակագծի մշակման անհրաժեշտություն:
Հաշվի առնելով ճարտարապետական նախագծման ոլորտում Գերմանիայի Դաշնային Հանրապետության օրենքների համաձայն հիմնադրված և գործող ՋիԷմՓի ինթերնեյշնլ ՋիԷմԲիԷյջ արքիթեքթս ընդ էնջինիերս ընկերության (այսուհետ՝ Ընկերություն) փորձը, հեղինակությունը, ինչպես նաև ծրագրի շրջանակներում նախատեսվող տրանսֆորմեր համերգասրահի կառուցման բացառիկ հեղինակային իրավունքը՝ նպատակահարմար է համարվել «Ակադեմիական քաղաք» ծրագրի համար գլխավոր հատակագծի մշակման աշխատանքները պատվիրել Ընկերությանը, որն իր ծառայությունների մատուցման շրջանակներում համագործակցելու է «Ճարտարապետության և շինարարության Հայաստանի ազգային համալսարան» հիմնադրամի (այսուհետ՝ Համալսարան) հետ։
Ծրագրի իրականացման համար Հայաստանի Հանրապետության օրենսդրությամբ նախատեսված բոլոր անհրաժեշտ ելակետային տվյալների և այլ նյութերի ու տեղեկատվության տրամադրման աշխատանքները նպատակահարմար է համարվել պատվիրել Համալսարանին՝ հաշվի առնելով այն հանգամանքը, որ Համալսարանը համապատասխան ճարտարապետաշինարարական կրթություն առաջարկող միակ հաստատությունն է և կապահովի ուսանողներին Ծրագրի իրականացման աշխատանքներում ներգրավելու բացառիկ հնարավորություն։
Ընկերության և Համալսարանի համագործակցությունը տեղական կրթական և մասնագիտական ներուժի զարգացման հնարավորություն կընձեռի, այդ թվում՝ փորձի փոխանակման և ուսանողների ընդգրկման միջոցով։