Երկուշաբթի առավոտյան Հոնկոնգում արտահանձնման մասին օրինագծի հազարավոր հակառակորդներ համաքաղաքային գործադուլով խափանել են տրանսպորտային հաղորդակցությունը: Այս մասին տեղեկացնում են տեղական լրատվամիջոցները:
Ցուցարարներն արգելափակել են ճանապարհներն ու թունելները, ինչպես նաև խափանել են ռելսային տրանսպորտի և ավտոբուսների երթևեկությունը, որ կառավարությանը հարկադրեն կատարել իրենց պահանջները: Ակցիայի կազմակերպիչները նախատեսում են խոչընդոտել քաղաքի բնակիչներին հասնել բիզնես շրջաններում տեղակայված աշխատավայրեր: Ցույցերն անդրադարձել են նաև Հոնկոնգի միջազգային օդանավակայանի աշխատանքի վրա, որտեղ կգործի միայն մեկ թռիչքավայրէջքային ուղի:
Ակցիայի քննադատները հայտարարում են, որ բիզնեսի բոլոր ոլորտների՝ ռեստորաններից մինչև ավիացիա, աշխատանքի այսպիսի մեծածավալ խափանումը ահռելի վնաս կհասցնի Հոնկոնգի հեղինակությանը, որը հպարտանում է իր կայունությամբ և ծառայությունների համաշխարհային մակարդակով:
Ցուցարարների պահանջները չեն փոխվել. նրանք հանդես են գալիս արտահանձնման մասին օրինագծում փոփոխությունները ամբողջական հետ կանչելու և ցույցերի ժամանակ ոստիկանների գործողությունների քննություն անցկացնելու օգտին:
Հերթական ակցիան է անցկացվում, քանի որ անցած հանգստյան օրերին շրջանում կրկին ցուցարարների և ոստիկանների միջև տեղի են ունեցել բախումներ, որոնք ավարտվել են արցունքաբեր գազի կիրառմամբ ու կալանավորումներով: