Թուրքիայում Ստամբուլի դատարանը ընդդիմադիր լրագրող Ֆաթիհ Ալթայլիին դատապարտել է չորս տարի և երկու ամիս ազատազրկման՝ նախագահ Ռեջեփ Թայիփ Էրդողանին «սպառնալու» մեղադրանքով։ Լրագրողը ձերբակալվել էր հունիսի վերջին, իսկ դատական նիստում մեղադրողները պահանջել էին նվազագույնը հինգ տարվա ազատազրկում։
Հետաքննությունը սկսվել է Ալթայլիի ծրագրից, որտեղ նա ենթադրություններ էր անում Թուրքիայի նախագահի հնարավոր «ցմահ կառավարման» մասին։ Լրագրողը նշել էր, որ դա քիչ հավանական է՝ հիշեցնելով Թուրքիայի պատմության դեպքերը, երբ բնակչությունը սուլթաններին հեռացրել էր։ Մեղադրողները նրա խոսքերը համարել են «սպառնալիք նախագահին»։
Դատական նիստում Ալթայլին հայտարարել է, որ իր խոսքերը սպառնալիք չեն եղել և ընդգծել է, որ Էրդողանը նրանցից չէ, որին կարելի է վախեցնել։ MLSA իրավապաշտպան խումբը, որը աջակցում է լրագրողին, X-ում հայտնել է, որ նա ճաղերի ետևում կմնա 4 տարի և 2 ամիս։