Հոկեյիստներ Ջոնի և Մեթյու Գոդրոների քույրը՝ Քեյթի Գոդրո-Ջոյսը, հունիսի 23-ին հայտնել է իր առաջնեկի ծննդյան մասին։ Ինչպես հաղորդում են New York Post-ը և ABC11-ը, Քեյթին իր որդուն անվանակոչել է Մեթյու Գայ Ջոյս՝ ի հիշատակ իր եղբոր՝ Մեթյու Գոդրոյի, որը ողբերգականորեն զոհվել է 2024 թվականին։
Հիշեցնենք, որ 2024 թվականի օգոստոսին՝ Քեյթիի հարսանեկան արարողության նախօրեին, Ջոնի և Մեթյու Գոդրոները Նյու Ջերսիում հեծանիվ վարելիս ենթարկվել են վթարի, որի հետևանքով մահացել են։ Վթարից հետո Քեյթին հետաձգել էր իր հարսանիքը՝ այն նշելով մեկ տարի անց՝ 2025 թվականի հուլիսին, ամուսնանալով Դևին Ջոյսի հետ։
Մեթյու Գայ Ջոյսը ծնվել է հունիսի 20-ին։ Քեյթին իր սոցիալական ցանցերում կիսվել է հուզիչ հաղորդագրությամբ՝ նշելով. «Այն պահը, երբ մեր սրտերն ավելի մեծացան, քան երբևէ կարող էինք պատկերացնել։ Բարի գալուստ աշխարհ, քաղցր տղաս»։
Մինչ ընտանիքը նշում է նորածնի ծնունդը, դատական գործընթացը, որը վերաբերում է եղբայրների մահվանը, դեռևս շարունակվում է։ Մեղադրյալ Շոն Հիգինսը, որը մեղադրվում է անզգույշ սպանության և ծանրացուցիչ հանգամանքներում սպանության մեջ, չի ընդունում իր մեղքը։ Նրան սպառնում է մինչև 70 տարվա ազատազրկում։