Լիլիթ Պողոսյանը վարկանիշային մրցաշարերի կմասնակցի մինչև Մինսկի Եվրոպական խաղերը

Հունիսին Մինսկում անցկացվելիք եվրոպական մարզական երկրորդ խաղերի բադմինթոնի մրցաշարի մասնակիցների ցանկում, ամենայն հավանականությամբ, տեղ կունենա նաև Լիլիթ Պողոսյանը:

Նա այժմ աշխարհի 1000 բադմինթոնիստուհիների դասակարգման աղյուսակում զբաղեցնում է 235-րդ հորիզոնականը:

Հայ մարզուհին լավ է սկսել Իրանի Կարաջ քաղաքի միջազգային մրցաշարը:

Մեկնարկում հաղթելով /21 : 18 և 21 : 17/ տանտիրուհիների առաջատարին, նա մտել է 1/16 եզրափակիչ:
Հաջող էր նաև երկրորդ փուլում ինդոնեզացի մարզուհու հետ պայքարի սկիզբը: Բայց երևանցին ոտքի վնասվածք ստացավ և բժիշկների պահանջով դադարեցրեց մրցելույթը:

Հայ մարզուհին այժմ ապաքինվում է և նպատակ ունի հանդես գալ փետրվարի 28-ին Սլովակիայի Տրենշին քաղաքում սկսվող վարկանիշային մրցաշարում:

Ի դեպ, միավորներ տվող մրցաշարերը շարունակական են: Այսպես, մարտի 7-ին` Պորտուգալիայում, նույն ամսի 16-ին ` Շվեյցարիայում և այդպես, մինչև Մինսկի ստուգատեսը, նշանակված են վարկանիշային մրցումներ:

Հաղորդում է armsport.am-ը։