Միջազգային կոմերցիոն ավիաուղիները Մերձավոր Արևելքով չվերթները վերաուղղորդում են՝ ԱՄՆ-ի և Իրանի միջև լարվածության էսկալացիայի ֆոնին հնարավոր վտանգներից խուսափելու համար։ Այս մասին հաղորդում է AP-ն:
Ավստրալական Qantas ավիափոխադրողը հայտարարել է, որ Իրանի և Իրաքի օդային տարածքից խուսափելու համար Լոնդոնից Փերթ իր երթուղին փոխում է՝ մինչև հետագա իրազեկում:
Malaysia Airlines ավիաընկերությունը հայտարարել է, որ «վերջին իրադարձությունների պատճառով» իր ինքնաթիռները կխուսափեն Իրանի օդային տարածքից:
«Սինգապուրյան ավիաուղիները» նույնպես հայտարարել է, որ Եվրոպա իր չվերթները վերաուղղորդվելու է՝ Իրանի երկնքով թռիչքներից խուսափելու համար:
ԱՄՆ Դաշնային ավիացիոն վարչությունը հայտարարել է, որ ամերիկացի օդաչուներին և ինքնաթիռներին արգելում է թռչել Իրաքի, Իրանի և Պարսից ծոցի որոշ երկրների օդային տարածքների շրջանում: Գործակալությունը զգուշացրել է ԱՄՆ-ի և Իրանի հարաբերությունների մեծ լարվածության պայմաններում քաղաքացիական ինքնաթիռների «հնարավոր վրիպման կամ սխալ նույնականացման» մասին:
Հնդկաստանի քաղաքացիական ավիացիայի գլխավոր տնօրինությունը հնդկական կոմերցիոն փոխադրողներին խորհուրդ է տվել խուսափել Իրանի, Իրաքի և Պարսից ծոցի օդային տարածքից:
«Ռոսավիացիան» նույնպես հանդես է եկել պաշտոնական հանձնարարականով ռուսական բոլոր ավիաընկերությունների համար՝ խուսափել Իրանի, Իրաքի, Պարսից ծոցի և Հորմուզի նեղուցի երկնքով թռիչքներից՝ «միջազգային քաղաքացիական չվերթների անվտանգության համար գոյություն ունեցող ռիսկերի պատճառով»:
Գերմանական Lufthansa ավիաընկերությունը հայտարարել է, որ ընթացիկ իրավիճակի լույսի ներքո չեղարկել է Ֆրանկֆուրտից Թեհրան իր չվերթը:
Ղազախստանյան առնվազն երկու ավիաընկերություններ՝ «Էյր Աստանան» և «ՍԿԱՏ»-ը դիտարկել են Իրանի երկնքով երթուղու փոփոխման կամ իրենց չվերթների չեղարկման հնարավորությունը՝ ուկրաինական ինքնաթիռի կործանումից հետո, որի հետևանքով զոհվել էր 176 մարդ:
Flydubai ավիաընկերությունը չորեքշաբթի չեղարկել է Դուբայից Բաղդադ կանոնավոր չվերթը, բայց շարունակում է թռիչքները Բասրա և Նաջաֆ: Դուբայի և Բաղդադի միջև Emirates ավիաընկերության չվերթները չեղարկվել են:
Սակայն Qatar Airways-ը հայտարարել է, որ Իրաք իր չվերթները կատարվում են սովորական ռեժիմով:
Աղբյուրը՝ News.am