Հայաստանի ազգային հավաքականի և Լոնդոնի «Արսենալի» կիսապաշտպան Հենրիխ Մխիթարյանի վնասվածքը լուրջ է:
Ֆուտբոլիստի ապաքինման համար կպահանջվի 6 շաբաթ: Այդ առիթով «Արսենալի» որոշ երկրպագուներ շտապել են ցույց տալ իրենց ուրախությունը թվիթերյան միկրոբլոգում` գրառումներ կատարելով:
Ինչպես գրում է Daily Star-ը, երկրպագուները պահանջում են «զինագործների» գլխավոր մարզիչ Ունայի Էմերիից փնտրել նոր եզրային կիսապաշտպանի, որը կկարողանա փոխարինել Հենրիխ Մխիթարյանին:
Ընթացիկ մրցաշրջանում Մխիթարյանն անկայուն խաղ է ցուցադրում, ինչի պատճառով որոշ երկրպագուներ պարբերաբար իրենց դժգոհությունն են արտահայտում:
«Մխիթարյանը շարքից դուրս է մնացել 6 շաբաթով: Ծննդյան տոների լավագույն նվերս»
Երկրպագուներից մեկը նշել է, որ Մխիթարյանի վնասվածքը թիմին նոր եզրային կիսապաշտպան փնտրելու լավ առիթ է հանդիսանում:
««Արսենալի» իսկական երկրպագուն նման իրավիճակում չի ուրախանում: Հավատացե՛ք ինձ: Նա 4 գոլ է խփել ընթացիկ մրցաշրջանում, իսկ դա վատ չէ»
Հաղորդում է armsport.am-ը։