Նեապոլի քաղաքապետ Գաետանո Մանֆրեդին ներկայացրել է «Դիեգո Արմանդո Մարադոնա» մարզադաշտի վերակառուցման 200 միլիոն եվրո արժողությամբ նախագիծը։ Ծրագիրը ներառում է վազքուղու հեռացումը, ինչը թույլ կտա երկրպագուներին ավելի մոտ լինել խաղադաշտին։ Այս քայլը կատարվում է ՈՒԵՖԱ-ի նախագահ Ալեքսանդր Չեֆերինի կոշտ նախազգուշացումից հետո, ով հայտարարել է, որ Իտալիան կարող է զրկվել Եվրո-2032-ի համահյուրընկալողի կարգավիճակից, եթե մարզադաշտերի վիճակը չբարելավվի։
Ներկայումս Իտալիայի 11 քաղաք հավակնում է ընդունել առաջնության հանդիպումները, սակայն ըստ ՈՒԵՖԱ-ի՝ միայն Թուրինի «Ալյանց» մարզադաշտն է պատրաստ միջազգային չափանիշներին։ Իտալիան պետք է հստակեցնի հյուրընկալող հինգ քաղաքների ցանկը մինչև 2026 թվականի հոկտեմբեր, իսկ շինարարական աշխատանքները պետք է սկսվեն 2027 թվականի մարտից։ Նեապոլի իշխանությունները շեշտում են, որ այս նախագիծը կենսական նշանակություն ունի քաղաքի համար՝ անկախ Եվրո-2032-ի արդյունքներից։