Meduza լրատվամիջոցի հաղորդմամբ՝ Բեռլինի «Շարիտե» հիվանդանոցի բժիշկները ռուս ընդդիմադիր քաղաքական գործիչ Ալեքսեյ Նավալնիին հանել են բժշկական կոմայից և աստիճանաբար անջատում են թոքերի արհեստական օդափոխման սարքից։
Նշվում է, որ Նավալնին սկսել է արձագանքել շրջապատին։ Բժիշկների խոսքերով՝ նրա վիճակը լավացել է։
Հիվանդանոցը հայտնում է, որ առայժմ վաղ է խոսել Նավալնիի առողջության վրա թունավորման երկարաժամկետ հետևանքների մասին։
Հիշեցնենք, որ օգոստոսի 20-ից Նավալնին արհեստական կոմայի մեջ է գտնվում։ Ինքնազգացողությունը կտրուկ վատացել էր Տոմսկից Մոսկվա ուղևորվող ինքնաթիռում։ Օդանավն արտակարգ վայրէջք էր կատարել Օմսկում, որտեղ Նավալնին սկսել էր բուժում ստանալ։ 2 օր անց քաղաքական գործչին տեղափոխել էին Բեռլին։
Իսկ մինչ այս հայտնել էինք, որ Սեպտեմբերի 2-ին Գերմանիան հայտարարել էր, որ Ալեքսեյ Նավալնիի օրգանիզմում հայտնաբերվել է «Նովիչոկի» խմբին պատկանող նյարդապարալիտիկ նյութ։