Հանրության համար նոր քննարկումների առիթ դարձավ Օրերս հայտնի դարձած այն լուրը, թե Հայաստանում 2020 թվականին մասնավոր ընկերությունները 2 դիակիզարան կբացեն: Մի մասը քննադատեցին, թե դիակներն այրելը հակաքրիստոնեական է, շատերն էլ մտահոգություն հայտնեցին օր օրի մեծացող գերեզմանոցների մասին:
Այս մասին իր կարծիքը հայտնեց նաև ՀՀ Առողջապահության նախարար Արսեն Թորոսյանը, ով իր Ֆեյսբուքյան էջում գրառում էր կատարել այս հարցի շուրջ: Նա կարևորել էր երկրում դիակիզարանների կառուցումը և նշել, որ օր օրի մեծացող գերեզմանները մեծ վտանգ են պարունակում իրենց շրջակայքում բնակվող մարդկանց համար:
«Ունեցել ենք դեպք, երբ տներին մոտ կառուցված գերեզմանները տարբեր տեղումների պատճառով քայքայվել են, ամբողջ զանգվածները դուրս են եկել»,- նշեց Թորոսյանը՝ հավելելով, որ ինչքան հնարավոր է, անհրաժեշտ է սանիտարական նորմերը պահպանել, իսկ մեզ մոտ գերեզմաններ կան, որոնք տներին շատ մոտ են, դա արդեն վտանգավոր է:
Թորոսյանի կարծիքով՝ դիակիզարանների կառուցումը կարևոր է ոչ միայն սանիտարահիգիենիկ նորմերի պահպանման, այլև հանրային նշանակության հողերի տնտեսման առումով, որպեսզի դրանք հնարավորինս էֆեկտիվ օգտագործվեն: Խնդրի հետ կապված, ըստ նրա, նախարարությունը համայնքներից բազմաթիվ դիմումներ է ստանում, մտահոգված քաղաքացիները հարցնում են, թե ինչպես լուծել տների մոտ գերեզմանների առկայության խնդիրը, միգուցե հանգուցյալներին ուրիշ տեղ հուղարկավորեն, որ տներին այդքան մոտ չլինեն և վտանգ չներկայացնեն:
«Հասունացել է այն պահը, որ Հայաստանում պետք է լինեն դիակիզարաններ, և այդտեղ որևէ հակամարդկային կամ հակակրոնական բան չկա»,- նշեց նախարարը՝ հավելելով, որ Եվրոպայի ամենակրոնացված երկրում՝ Լեհաստանում, նման բան կա, և իրենք ոչ մի խնդիր չեն տեսնում դիակիզարան ունենալու մեջ, նույնն էլ Ռուսաստանում և Ուկրաինայում:
