Հունվարի 9-ին ռեժիսոր Զառա Ջյանի «Ես վրեժխնդիր կլինեմ աշխարհից սիրո միջոցով – Ս. Փարաջանով» վավերագրական ֆիլմը կցուցադրվի Երևանում՝ Սերգեյ Փարաջանովի ծննդյան օրը։ Ֆիլմի համաշխարհային պրեմիերան կայացել է Վենետիկի միջազգային կինոփառատոնի շրջանակներում՝ ավելի քան 20 տարվա ընդմիջումից հետո հայկական դրոշն ու կինոն վերադարձնելով Վենետիկ։
Ֆիլմը հայ-ֆրանսիական համատեղ արտադրություն է և պատմում է Փարաջանովի ստեղծագործական ուղու և նրա դիմագրաված դժվարությունների մասին։ Ռեժիսոր Զառա Ջյանը նշել է, որ այս նախագիծը դասական ինքնակենսագրություն չէ, այլ ստեղծագործողի ճանապարհորդություն, որը փորձում է գտնել կյանքի շարունակման ուղիները։ Պատմությունը համադրում է անցյալն ու ներկան՝ ներկայացնելով համամարդկային թեմաներ, ինչպիսիք են ազատության ձգտումը, դիմադրությունը և արվեստի գոյատևումը բռնապետական պայմաններում։
Ֆիլմում մասնակցում են հայտնի ռեժիսորներ և մշակութային գործիչներ՝ Ատոմ Էգոյան, Էմիր Կուստուրիցա, Թարսեմ Սինխ, Չուլպան Խամատովա, Ժոել Շապրոն, Ալի Խամրայև, Լորա Գուերրա, ակադեմիկոս Լևոն Աբրահամյան և ռեժիսոր Արտավազդ Փելեշյան։ Ֆիլմի տասներորդ հերոսը հենց Սերգեյ Փարաջանովն է, որը միավորում է բոլորին իր բացառիկ արվեստով և անձով։
Ֆիլմը հաջողությամբ ցուցադրվել է միջազգային փառատոներում, ներառյալ Վենետիկում, Նեապոլում, Բելգիայում, Սերբիայում և Արգենտինայում։ Հատկանշական է, որ Արգենտինայի Mar del Plata International Film Festival-ում ֆիլմի ցուցադրությունը նշանավորեց Փարաջանովի խորհրդանշական վերադարձը 59 տարի անց։
Ֆիլմի միջոցով հեղինակները ուսումնասիրում են այնպիսի թեմաներ, ինչպիսիք են արվեստի ազդեցությունը ազատության և հակամարտության պայմաններում, ինչպես նաև մշակույթի դերը պատերազմի և բռնության պայմաններում։ Փարաջանովի տուն-թանգարանը ներկայացված է որպես ոգեշնչման վայր, որը խորհրդանշում է անցյալի և ներկայի հանդիպումը։
Ֆիլմի ստեղծմանն աջակցել են Հայաստանի ազգային կինոկենտրոնը, ԿԳՄՍՆ-ն, ինչպես նաև ֆրանսիական CNC և Cine+ կազմակերպությունները։ Երևանյան պրեմիերան խոստանում է վերականգնել հետաքրքրությունը Փարաջանովի ժառանգության նկատմամբ՝ ներշնչելով հանդիսատեսին նրա կյանքով և ստեղծագործությամբ։
