Քաղաքական հետապնդումների մասին խոսք լինել չի կարող: Այս մասին այսօր՝ հունվարի 13-ին, Ծիծեռնակաբերդում լրագրողների հետ զրույցում ասաց ԱԺ նախագահ Արարատ Միրզոյանը՝ մեկնաբանելով ՍԴ նախագահի հայտարարությանը, թե իրեն զգուշացրել են, որ եթե հրաժարական չտա, մեղադրանք կառաջադրեն:
Նա նշեց, որ Հրայր Թովմասյանի կամ որևէ այլ անձի երբևէ կատարած կամ առերևույթ կամ իրեն մեղսագրվող հանցագործությունը կապ չունի այս պահին կամ երբևէ նախկինում ունեցած պաշտոնի հետ։
Ինչ վերաբերում է մամուլում հայտնված լուրերին, թե իշխանությունները ՍԴ դատավորների անձնական կյանքի մասին տվյալներ են հավաքում, ԱԺ նախագահն ասաց, որ այդքան ժամանակ չունի մտացածին բաներ մեկնաբանելու համար:
Միաժամանակ նա ընդգծեց, որ ճգնաժամը ՍԴ-ում շարունակվում է ու հանգուցալուծում չի ստացել:
Հարցին՝ Հրայր Թովմասյանի նկատմամբ քրեական գործի հարուցումը այդ հանգուցալուծումներից մե՞կն է, Միրզոյանը նշեց, որ հրաժարականը դրա հետ կապ չունի:
«Դա նույնն է, որ ես հիմա որևէ հանցագործություն անեմ, հետո, երբ մեր իշխանությունը փոխվի ժողովրդի որոշմամբ, նոր իշխանությունները, իրավապահ համակարգը սկսի հետազոտել իմ որևէ արած հանցագործություն, և ես ասեմ՝ այ, քանի որ ես զբաղեցրել եմ պաշտոն, ինձ քաղաքական հետապնդման են ենթարկում»,-ասաց նա և հորդորեց այդ երկու երևույթներն իրար հետ չկապել:
Միրզոյանն ընդգծեց, որ լիներ ՍԴ-ի շուրջ այն ճգնաժամը, որի մասին ինքը հաճախ խոսում է, չլիներ, կապ չունի, այս մեղսագրվող արարքի մասին բացահայտում եթե արվեր, պետք է գնար այս նույն հունով:
«Անկախ ամեն ինչից, եթե իրավապահներն այս նույն ճանապարհով գնային, բացահայտումներ անելու էին: Քրեական գործը պայմանավորված չէ Հրայր Թովմասյանի պաշտոնավարմամբ»,-նշեց նա:
Հարցին՝ երբ սուրբծննդյան պատարագին հանդիպել է ՍԴ նախագահ Հրայր Թովմասյանին, նա բարձրաձայնե՞լ է իր մտահոգությունների մասին, Արարատ Միրզոյանը պատասխանեց. «Չէ, մենք մեկ-երկու կատակ արեցինք, այդքանը»:
Իսկ թե որն է լինելու ՍԴ ճգնաժամի լուծման հաջորդ քայլը, Միրզոյանն ասաց՝ կապրենք, կտեսնենք:
«Աշխատանքային հազար ուղղություն կա, և ՍԴ-ի այս թնջուկի հարթումը բազմաթիվ ուղղություններից միայն մեկն է: Այնպես չէ, որ մենք քնում, արթնանում ենք՝ միայն այս խնդրի մասին մտածելով, և մեր գերնպատակն է Հրայր Թովմասյանին հեռացնելը ՍԴ-ից»,-ասաց ԱԺ նախագահը։