Հուլիսի 22-ին լրագրողների հարցերին պատասխանելիս ՀՀ Պաշտպանության նախարար Դավիթ Տոնոյանը հայտնեց, որ Հայաստանի զինված ուժերի՝ Ռուսաստանից պատվիրված Սու-30 ինքնաթիռները, պայմանավորվածության համաձայն, արդեն Հայաստանում կլինեն այս տարվա վերջ – հաջորդ տարվա սկիզբ ընկած ժամանակահատվածում
«Տոռ» հակաօդային պաշտպանության համակարգերի մասին հարցին պատասխանելիս նա ժպիտով նշեց՝ շատ հետաքրքիր համակարգեր են։ Անդրադառնալով սպառազինությանը՝ Տոնոյանն ասաց․ «Ես շատ բաներ չեմ կարող հիմա դրա մասին խոսել, բայց, այսպես ասած, ռազմական անակնկալներ են լինելու»։
Պատասխանելով Զինված ուժերում մարդկային կորուստներին հարցին՝ նախարարն ընդունեց, որ որոշ դեպքերում խնդիրներ կան, քանի որ ժամանակին չեն կարողացել բացահայտել զինծառայողների հոգեվիճակները։
Տոնոյանը նաև ասաց, որ իրենց համար յուրաքանչյուր կորուստ ցավալի է, և վիճակագրություն կազմելն այս դեպքում անտեղի է։ Նա նաև նախնական տեղեկություններ հաղորդեց, որ միջադեպերի թվով այս տարի նվազում կա։