Հուլիսի 20-ին շրջակա միջավայրի նախարարությունը հաղորդագրություն է տարածել և հայտնում է, որ նախարարի պաշտոնակատար Ռոմանոս Պետրոսյանն աշխատանքային այցով «Խոսրովի անտառ» պետական արգելոցում է:
«Նախարարի պաշտոնակատարն այցի շրջանակում աշխատանքային խորհրդակցություն է անցկացրել ՊՈԱԿ-ի ղեկավար կազմի, ստորաբաժանումների ղեկավարների և արգելոցի տեղամասերի պետերի հետ։
Նախարարի պաշտոնակատարը շրջել է տարածքում, ծանոթացել իրականացվող աշխատանքներին ու պահպանման ռեժիմի առանձնահատկություններին, քննարկվել են նոր մշակված տուրիստական բաղադրիչի զարգացման, զբոսաշրջային հոսքերի կառավարման,ինչպես նաև հրդեհաշիջման նյութերի և համապատասխան կապի միջոցների առկայության հետ կապված հարցեր:
Անդրադարձ է կատարվել նաև արգելոցի ենթակայության տակ գտնվող տարածքների կադաստրային շտկումների խնդրին:
Պետրոսյանը շնորհակալագրեր է հանձնել ՊՈԱԿ-ի աշխատակիցներին, որոնք ակտիվորեն մասնակցել են շաբաթներ առաջ «Խոսրովի անտառ» պետական արգելոցի տարածքում բռնկված հրդեհների հրդեհաշիջման աշխատանքներին:
Նախարությունը հայտնում է, որ այցը շարունակվում է»,-ասվում է հաղորդագրության մեջ:
