Երևանի «Էրեբունի» օդանավակայանում տեղակայված ռուսական ռազմական ավիախմբի օդաչուները Հայաստանի երկնքում անցկացրել են հակառակորդի օդային ուժերը չեզոքացնելու վարժանքներ, որոնց ժամանակ հասել են մինչև ստրատոսֆերա՝ մթնոլորտի վերին շերտ: Այս մասին հայտնել է Հայաստանում տեղակայված ռուսական ռազմաբազայի մամուլի ծառայությունը:
«Վարժական թռիչքների ընթացքում երիտասարդ օդաչուները կատարելագործել են ավիացիոն տեխնիկայով պարզ և բարդ պիլոտաժի հնարքներ անելու ունակությունները լեռնային տարածքում՝ միջին բարձրություններում, ինչպես նաև ավելի քան 12 հազար մետր բարձրության վրա»,- նշվում է հաղորդագրության մեջ:
Մոտ 30 միավոր տեխնիկայի ներգրավմամբ վարժանքների ընթացքում ռազմական օդաչուները ՄիԳ-29 կործանիչ ինքնաթիռների զույգերով կամ առանձին միավորներով իրականացրել են հակառակորդի ինքնաթիռներին որսալու, ոչնչացնելու մանևրներ:
«Էրեբունի» օդանավակայանում տեղակայված ռուսական ավիախումբը, հիշեցնենք, մտնում է Գյումրիում տեղակայված ռուսական ռազմաբազայի մեջ և կոչված է ՀԱՊԿ շրջանակներում Հայաստանի օդային տարածքի պաշտպանություն ապահովելուն:
