Samsung ընկերությունը պատահաբար գաղտնազերծել է իր Galaxy Ring մատանու թողարկման ամսաթիվը, ինչպես նաև դրա որոշ բնութագրեր, այս մասին տեղեկացնում է Gizmochina.com-ը։
Ընկերությունը դատական գործընթաց է սկսել՝ իրավական հաստատում ստանալու համար, որ Galaxy Ring-ը չի խախտում ֆիննական Oura-ի արտոնագրերը, որն ապրանքների այս կատեգորիայի հիմնական խաղացողներից մեկն է:
Հայցի երրորդ էջում Samsung-ը նշել է, որ իրենք ավարտել են Galaxy Ring-ի մշակումը նախատեսում են արտադրանքի զանգվածային արտադրությունը սկսել այս տարվա հունիսի կեսերին։ Փաստաթղթում նաև նշվում է, որ Samsung-ը նոր արտադրանքը կթողարկի ԱՄՆ-ում «մոտավորապես այս տարվա օգոստոսին»։ Ընկերությունը չի նշել, թե ուրիշ որ երկրներում նոր մատանին հասանելի կլինի:
Ակնկալվում է, որ Samsung-ը կներկայացնի Galaxy Ring-ը իր 6-րդ սերնդի ծալվող սմարթֆոնների հետ միասին գալիք Galaxy Unpacked միջոցառմանը, որը նախատեսված է հուլիսին: Ընկերությունը հուլիսին ծալվող սմարթֆոնների մասին հայտարարելու և օգոստոսի սկզբին դրանք թողարկելու նախադեպ արդեն ունի: Հետևաբար, ըստ աղբյուրի՝ հայցը փաստացի հաստատում է խոսակցությունները, որ Samsung-ը Galaxy Unpacked միջոցառմանը կհայտարարի նոր մատանու մասին։
Փաստաթղթում նաև գաղտնազերծվում է Galaxy Ring-ի որոշ բնութագրեր։ Մասնավորապես, նշվում է, որ հիմնվելով առողջության և ֆիթնեսի հետագծման տեխնոլոգիաների վրա՝ ներառյալ Galaxy Watch-ը և Samsung Health հավելվածը, Galaxy Ring-ը հետևում է սրտի զարկերի հաճախությանը, սրտի բաբախյունի փոփոխականությանը, արյան մեջ թթվածնի մակարդակին, շարժմանը և քնին՝ օգտատերերին տրամադրելով արժեքավոր տեղեկություններ և տալով խորհուրդներ իրենց ինքնազգացողությունն ու առողջությունը բարելավելու համար։
Հաղորդվում է, որ առողջությանը հետևելու ընդհանուր համակարգը գրանցված տվյալների վրա նաև կգնահատի մարդու օրգանիզմում առկա էներգիայի մակարդակը։