ԱՄՆ նախագահ Դոնալդ Թրամփը հայտարարել է, որ Սաուդյան Արաբիայի նավթային օբյեկտների վրա հարձակումները վերագրվում են Իրանին, բայց հետաքննությունը դեռ շարունակվում է: Այս մասին հաղորդում է Интерфакс-ը։
«Մենք անպայման կտեղեկացնենք ձեզ հետաքննության արդյունքների մասին․ այն հենց հիմա շարունակվում է»,-ասել է ԱՄՆ նախագահը:
Նա ընդգծել է, որ ԱՄՆ-ն չի ցանկանում պատերազմել Իրանի հետ, սակայն չի բացառել, որ Իրանին Սաուդյան Արաբիայի նկատմամբ հարձակումների համար կարող է ռազմական պատասխան տրվել:
«Չնայած վերը նշվածին, իհարկե, մենք կցանկանայինք խուսափել Իրանի հետ բախումից»,-հավաստիացրել է Թրամփը:
Միաժամանակ նա նշել է, որ ԱՄՆ-ն պատրաստ է հնարավոր հակամարտության ավելի, քան որևէ երկիր:
ԱՄՆ նախագահը նաև կարծում է, որ դիվանագիտությունը դեռևս կարող է դրական դեր ունենալ Իրանի շուրջ ստեղծված իրավիճակի հարցում, և Թեհրանը, այնուամենայնիվ, ցանկանում է համաձայնության գալ Վաշինգտոնի հետ, և հարմար պահի դա իրականություն է դառնալու:
Թրամփին նաև հարցրել են, թե արդյոք նա խոստացել է պաշտպանել Էր-Ռիադը, նա պատասխանել է. «Ոչ, նման բան ես սաուդներին չեմ խոստացել։ Մենք պետք է նստենք սաուդացիների հետ բանակցությունների սեղանի շուրջ և այդ ուղղությամբ ինչ-որ բան մշակենք»: