Այսօր մամուլի ասուլիսի ընթացքում ՀՀ վարչապետ Նիկոլ Փաշինյանին հարց տվեցին Արարատ Միրզոյանի այն ելույթի մասին, որը վերաբերում էր Սահամանդրական դատարանի շուրջ ստեղծված իրավիճակին: Հարցը հետևյալն էր. ինչպե՞ս է վարչապետն ընդունել ԱԺ նախագահ Արարատ Միրզոյանի հայտարարությունը, ԱԺ-ն պետք է գնահատական տա ՍԴ՝ սեպտեմբերի 4-ի որոշմանը, արդյո՞ք քաղաքական գնահատականները բավարա՞ր են, թե՞ ոչ:
«Ես ողջունում եմ Արարատ Միրզոյանի հայտարարությունը, չեմ կարծում, թե նա քաղաքական գնահատական նկատի ուներ: Շատ իրավաբաններ կան, որ պնդում էին՝ ՍԴ-ն կայացրել է ապօրինի որոշում: Ես զգուշավորությամբ էի վերաբերվում այդ հայտարարություններին, բայց ՍԴ երկու անդամների հատուկ կարծիքի հրապարակումն ակնհայտ է դարձնում, որ ՍԴ-ն կայացրել է ապօրինի որոշում: Ինչո՞ւ է կայացրել: Դուք գիտեք՝ ինչու, գիտեք՝ ով է ՍԴ նախագահը: Ես Ձեզ ասեմ՝ այդ որոշումն ընդունած դատավորներից առնվազն երկուսը Մարտի 1-ի հետ ուղիղ կապ ունեն, և անհասկանալի է՝ ինչո՞ւ ինքնաբացարկ չեն հայտնել և ինչո՞ւ են մասնակցել այդ գործով որոշման կայացմանը: ԱԺ նախագահը նկատի է ունեցել, որ պետք է այս իրավիճակը քննարկվի»,- ասաց նա:
Փաշինյանը նշեց՝ ՍԴ-ն բոլոր դժբախտությունների հեղինակ է, 96-ից սկսած՝ վերջիններս բոլոր կեղծիքները վավերացնող մասնիկ է:
Անդրադառնալով քաղաքական գնահատականին՝ Փաշինյանն ասաց. «Ես էլ տվեցի քաղաքական գնահատական, դրանից իրականությունը փոխվե՞ց»: