Կառավարության նիստում Գլխավոր դատախազ Աննա Վարդապետյանը ներկայացրեց Սևանա լճի ափամերձ տարածքներում առկա ապօրինի կառուցված շենք-շինությունների ապամոնտաժման ընթացքը։ Ըստ նրա, 34 հողամասերից միայն երեքում են շինությունները ամբողջությամբ ապամոնտաժվել։ Մնացած հողամասերի վերաբերյալ հարուցվել են վարչական վարույթներ և կայացվել 23 քանդման որոշումներ, որոնք դեռևս չեն կատարվել։ Վարդապետյանը շեշտեց, որ եթե աշխատանքները չկատարվեն, դատական կարգով կպահանջվի հարկադրել քանդման գործընթացը։
Նա նաև նշեց, որ ապօրինի կառույցների մեծ մասը պատկանում է նախկին և ներկա պաշտոնատար անձանց։ Դրանց թվում են «Հարսնաքար» համալիրն ու նախկին ոստիկանապետ Վլադիմիր Գասպարյանի առանձնատունը։ Վարդապետյանը հավելեց, որ որոշ գույքեր կարող են ունենալ տնտեսական, կրթական կամ առողջապահական ներուժ, ինչը պահանջում է ավելի լայն քննարկում։ Կառավարության որոշմամբ, 13.4 մլն դրամ արժեքով 1.5 հա հողամաս ամրացվել է Շրջակա միջավայրի նախարարությանը՝ Սևան ազգային պարկի օգտագործման համար։