Սողանքների դեպքում անհրաժեշտ գործողություններին նվիրված միջոցառում Տավուշում

Հունիսի 20-21-ը Տավուշի մարզի Դիլիջանի քաղաքապետարանում անցկացվեց բնակչության պաշտպանության նվիրված համալիր միջոցառում:

Փրկարար ծառայության (ՓԾ) բնակչության պաշտպանության և աղետների հետևանքների վերացման կազմակերպման և Տավուշի մարզային վարչությունների մասնագետների կողմից կազմակերպվել էր Տավուշի մարզի Հաղարծին համայնքում սողանքի ակտիվացման դեպքում համայնքի բնակչության պաշտպանության կազմակերպում» թեմայով շտաբային ուսումնավարժություն:

Վարժանքին ներգրավված էին Դիլիջանի քաղաքապետը, Տավուշի մարզպետարանի ներկայացուցիչները, Հաղարծինի և Թեղուտի համայնքապետերը:

Միջոցառման նպատակն էր՝ ստուգել քարաթափումների և սողանքների դեպքում գործողությունների պլանի իրատեսականությունը, միջոցառումների կազմակերպման և իրականացման գործում՝ մասնակիցների հմտություններն ու ունակությունները:

Համաձայն սցենարի՝ Հաղարծին համայնքի ղեկավարի և բնակիչների կողմից ստացվել են ահազանգեր, որ Երևան-Բագրատաշեն միջպետական ավտոճանապարհի 107-րդ կմ-ում Հաղարծինի մոտ ակտիվացել են սողանքները, նկատվել է հողի զանգվածի տեղաշարժ: Հարկավոր է իրականացնել կանխարգելիչ միջոցառումներ:

Ուսումնավարժության առաջին փուլում հետազոտվել է տարածքը, այնուհետև որոնողափրկարարական և անհետաձգելի վթարավերականգնողական աշխատանքներ են կազմակերպվել, և իրականացվել են բնակչության, կենդանիների, նյութական արժեքների պաշտպանության և տարահանմանն ուղղված միջոցառումներ:

Միջոցառման արդյունքով մատնանշվել են անհրաժեշտ կանխարգելիչ միջոցառումները.

1. Աղստև գետի հունի ուղղում,
2. միջպետական Մ4 ճանապարհի տվյալ հատվածի շրջանցող ճանապարհի բացում,
3. հարակից տարածքում դպրոցի անձնակազմի և աշակերտների ուսուցանում,
4. սողանքային զանգվածի բեռնաթափում,
5. համայքներում կամավոր փրկարարական ջոկատների կազմավորում:

Այս մասին տեղեկանում ենք ՀՀ ԱԻՆ պաշտոնական կայքից։