Ապրիլի 5-ին Լոս Անջելեսում ԱՄՆ ներգաղթի ծառայության գործակալները ձերբակալել են Իրանի Իսլամական հեղափոխության պահապանների կորպուսի (ԻՀՊԿ) հանգուցյալ հրամանատար Ղասեմ Սոլեյմանիի ազգականուհիներին՝ Համիդե Սոլեյմանի Աֆշարին և նրա դստերը՝ Սարինասադաթ Հոսեյնիին։ ԱՄՆ պետդեպարտամենտը չեղարկել է նրանց մշտական բնակության իրավունքը՝ նշելով, որ նրանք ԱՄՆ-ում շքեղ կյանք վարելիս միաժամանակ զբաղվել են Իրանի ռեժիմի քարոզչությամբ և ողջունել են ամերիկյան զինծառայողների դեմ հարձակումները։
ԱՄՆ ներքին անվտանգության դեպարտամենտի տվյալներով՝ Համիդե Սոլեյմանի Աֆշարը 2019 թվականին ստացել էր քաղաքական ապաստան, սակայն 2025 թվականի քաղաքացիության դիմումի ժամանակ պարզվել է, որ նա բազմիցս այցելել է Իրան, ինչը հիմք է տվել իշխանություններին նրա ապաստանի հայցը կեղծ որակելու համար։ Նրա դուստրը նույնպես 2019 թվականին ստացել էր ապաստան, իսկ 2023 թվականին՝ կանաչ քարտ։
Այս ձերբակալությունները մաս են կազմում Թրամփի վարչակազմի նոր քաղաքականության, որն ուղղված է ԱՄՆ-ում օտարերկրյա հակառակորդ պետությունների ղեկավարների հետ կապ ունեցող անձանց ներկայության սահմանափակմանը։ Պետդեպարտամենտի հայտարարության համաձայն՝ ԱՄՆ-ն այլևս թույլ չի տալիս, որ իր երկիրը դառնա հակաամերիկյան ահաբեկչական ռեժիմներին աջակցող անձանց ապաստարան։