Փանջշերում ինքնապաշտպանական ուժերը սպանել են թալիբների առաջնորդներից մեկին

Փանջշեր նահանգում Աֆղանստանի ազգային դիմադրության ուժերը սպանել են «Թալիբանի» առաջնորդներից մեկին՝ Մավլավի Ֆասիհուդդինին, ով նաև շարժման հրամանատարներից է։

Այս մասին հաղորդագրություն են տարածել թալիբների հակառակորդները։

Նշվում է, որ Ֆասիհուդդինի հետ միասին սպանվել են նաև 6 թիկնապահներ։

«Թալիբանից» դեռևս չեն մեկնաբանել այս տեղեկությունը։

Հիշեցնենք, որ ավելի վաղ թալիբները մի քանի անգամ ասացին, որ ամբողջությամբ վերահսկողության տակ են վերցրել Փանջշիրը։ Սկզբում դա հերքվեց ինքնապաշտպանական ուժերի ներկայացուցչի կողմից, իսկ հետո ուժերը գլխավորող Ահմադ Մասուդը Twitter-ում տարօրինակ գրառում կատարեց, նշելով, որ ինքը ապահով է, բայց գրառման վերջում ավելացնելով տխրություն նշանակող սմայլ։