Տաջիկստանի վարչապետ Կոխիր Ռասուլզոդան, ելույթ ունենալով Հավաքական անվտանգության պայմանագրի կազմակերպության (ՀԱՊԿ) Հավաքական անվտանգության խորհրդի առցանց արտահերթ նիստին, կոչ է արել դիվանագիտական միջոցներով արագ կարգավորել իրավիճակը Հայաստանի և Ադրբեջանի սահմանին, հաղորդում է «Խովար» լրատվական գործակալությունը։
Նշվում է, որ վարչապետը հանդիպմանը մասնակցել է Տաջիկստանի նախագահ Էմոմալի Ռահմոնի անունից։ Ռասուլզոդան հայտնել է տաջիկական կողմի մտահոգությունը Հայաստանի և Ադրբեջանի միջև սրման վերաբերյալ։ Նա ընդգծել է, որ այժմ «կարևոր է կանխել իրավիճակի հետագա սրումը և խնդիրների լուծման ուղիները հնարավորինս արագ քաղաքական ու դիվանագիտական հուն վերադարձնել»։
Ռասուլզոդան վստահություն է հայտնել, որ տարածաշրջանում խաղաղության և կայունության ապահովման միակ ճանապարհն ընդունված փաստաթղթերի հիման վրա երկխոսության միջոցների արդյունավետ օգտագործումն է։