Մարտի 24-ին Տոնգայի Նեիաֆու քաղաքի մերձակայքում գրանցվել է 7.6 մագնիտուդ ուժգնությամբ երկրաշարժ։ Ցնցումները զգացվել են կղզեխմբի տարբեր հատվածներում, ինչը տեղի իշխանություններին ստիպել է հրատապ տարհանման հրամաններ տալ և ցունամիի վտանգի մասին նախազգուշացումներ հրապարակել։ Տոնգայի օդերևութաբանական ծառայությունը բնակիչներին կոչ է արել անհապաղ տեղափոխվել բարձրադիր վայրեր՝ նշելով ցունամիի հնարավոր վտանգի մասին։
Միջազգային փորձագետները, սակայն, ավելի ուշ հաստատել են, որ ցունամիի սպառնալիք առկա չէ։ ԱՄՆ երկրաբանական ծառայության տվյալներով՝ ստորգետնյա ցնցումները տեղի են ունեցել մոտ 237 կիլոմետր խորության վրա։ Մասնագետների խոսքով՝ հենց այս մեծ խորությունն է պատճառ դարձել, որ երկրաշարժը չի առաջացրել ցունամիի համար անհրաժեշտ ծովային տեղաշարժեր։ Թեև ցնցումները զգալի էին, տեղական իշխանությունները հաղորդել են, որ խոշոր ավերածությունների կամ տուժածների մասին տեղեկություններ առայժմ չկան։