Այսօր վաղ առավոտից Ուկրաինայում մեկնարկել են Գերագույն ռադայի արտահերթ ընտրությունները։ Корреспондент-ի հաղորդմամբ՝ ընտրատեղամասերը 199 ընտրաշրջաններում բացվել են առավոտյան ժամը 8։00-ից և կփակվեն 20։00-ին։
Ընտրություններն անցկացվում են մեծամասնական-համամասնական սկզբունքով։ Միամանդատ շրջաններում քվեարկությանը մասնակցում է 3220 թեկնածու, որից 1404-ը ներկայացնում է 58 կուսակցություն և բլոկ, իսկ 1680-ն ինքնաառաջադրված թեկնածուներ են։ Բազմամանդատ-մեծամասնական համակարգով ընտրություններին մասնակցում է 2747 թեկնածու՝ 22 կուսակցությունից։
Ընտրելու իրավունք ունի Ուկրաինայի 34 մլն քաղաքացի։ Ֆավորիտ է համարվում նախագահ Վլադիմիր Զելենսկու «Ժողովրդի ծառա» կուսակցությունը։
Հիշեցնենք, որ ավելի վաղ Զելենսկին հայտարարել էր Ռադայի արձակման և արտահերթ ընտրությունների նշանակման մասին։