ԱՄՆ պետքարտուղար Մարկո Ռուբիոն հայտարարել է, որ Վաշինգտոնը պատրաստ է Ուկրաինային տրամադրել անվտանգության երաշխիքներ միայն այն դեպքում, եթե կնքվի խաղաղության համաձայնագիր։ Այս մասին հաղորդում է Politico-ն՝ հղում անելով անանուն եվրոպացի դիվանագետների և բանակցություններին ծանոթ աղբյուրների։ Ըստ տեղեկությունների՝ այս պայմանը ներառված է ԱՄՆ-ի կողմից Կիևին ներկայացված առաջարկներում։
Ուկրաինան Արևմուտքի անվտանգության երաշխիքները համարում է Ռուսաստանի հետ խաղաղության համաձայնագրի անկյունաքար։ Միևնույն ժամանակ, ԱՄՆ նախագահ Դոնալդ Թրամփը հայտարարել է, որ չի հրավիրի ուկրաինացի առաջնորդներին Սպիտակ տուն՝ մինչև համաձայնագիրը չստորագրվի։ Թրամփի վարչակազմը, ըստ Politico-ի, ձգտում է արագորեն համաձայնեցնել բոլոր դրույթները մեկ միասնական փաթեթով։
Եվրոպական դիվանագետները մտահոգություն են հայտնել, որ ԱՄՆ-ի դիրքորոշումը կարող է նպաստել Ռուսաստանի շահերին։ Նրանք ընդգծել են, որ քննարկումներում բացակայում են մարդու իրավունքների և միջազգային իրավունքի սկզբունքները։ Այս իրավիճակը, ըստ նրանց, կարող է հանգեցնել եվրոպական անվտանգության նոր ճարտարապետության, որը լի կլինի անցքերով։