Երևանի քաղաքապետարանի «Երևան» երիտասարդական նվագախումբը, որը Լիբանանում մասնակցում էր «Ալ Բուստան» միջազգային փառատոնին, անվտանգության նկատառումներից ելնելով, ժամանակից շուտ վերադարձել է Հայաստան։ Տարածաշրջանում լարվածության աճի պատճառով Երևանի քաղաքապետարանի նախաձեռնությամբ կազմակերպվել է հատուկ չվերթ, որի միջոցով 87 հոգուց բաղկացած համույթը ուղեկցող անձնակազմով վերադարձել է Երևան։ Քաղաքապետը շնորհակալություն է հայտնել Լիբանանում ՀՀ դեսպանությանը և լիբանանյան ազգային ավիաընկերությանը՝ երաժիշտների անվտանգ տեղափոխման համար։
Լիբանանում Հայաստանի դեսպանությունը հայտնել է, որ լիբանանյան կողմի հետ խորհրդակցությունների արդյունքում է կայացվել այս որոշումը։ Middle East Airlines ավիաընկերությունը, ընդառաջելով դեսպանության դիմումին, կազմակերպել է հավելյալ չվերթ՝ հատուկ այս նպատակով։ Դեսպան Սարմեն Բաղդասարյանն ու դիվանագետները անձամբ ուղեկցել են նվագախմբի անդամներին ռմբահարվող տարածքներով դեպի օդանավակայան։ Ինքնաթիռն արդեն հաջողությամբ վայրէջք է կատարել Երևանում։