Հուլիսի 4-ին Թուրքիայի արտգործնախարարության տարածած հայտարարության համաձայն՝ Թուրքիայի և Եգիպտոսի միջև դիվանագիտական հարաբերությունները հասցվել են դեսպանների մակարդակի:
Այս մասին գրում է ermenihaber-ը:
Հայտարարության մեջ նշվում է, որ երկու երկրները հունիսի 4-ին փոխադարձաբար դեսպաններ են նշանակել:
Կահիրեում Թուրքիայի դեսպան է նշանակվել Սալիհ Մութլու Շենը, Իսկ Անկարայում Եգիպտոսի դեսպան՝ Ամըր Էլհամամայը:
Կահիրեի և Անկարայի միջև հարաբերությունները սրվել էին այն բանից հետո, երբ Եգիպտոսի բանակը 2013-ին գահընկեց էր արել Թուրքիայի նախագահ Ռեջեփ Թայիփ Էրդողանի դաշնակից, «Մահմեդական եղբայրներ» շարժման նախագահ Մուհամեդ Մուրսիին:
Այդ տարեթվից ի վեր Թուրքիայի և Եգիպտոսի դիվանագիտական հարաբերությունները շարունակվում էին գործերի ժամանակավոր հավատարմատարի մակարդակով:
Սկսյալ 2021 թվականից երկու երկրների միջև նկատվել են հարաբերությունների բարելավում։ Ապրիլի 10-ին Թուրքիայի արտգործնախարար Մևլութ Չավուշօղլուի և եգիպտացի գործընկերոջ Սամիհ Շյուքրյույի միջև հեռախոսազրույց էր տեղի ունեցել:
Եգիպտոսը պատրաստակամություն էր հայտնել Թուրքիայի հետ միջազգային իրավունքի հիման վրա հարաբերություններ հաստատել, ինչպես նաև սկսել երկխոսություն, որից երկու կողմերն էլ կշահեն:
