Երևանի պետական բժշկական համալսարանի ռեկտոր Արմեն Մուրադյանը Facebook-ի իր էջում անդրադարձել է կորոնավիրուսի 5-րդ ալիքին։
- Հայաստանում մեկ օրում քովիդի 1000-ից քիչ նոր դեպք է գրանցվել
- Հայաստանում հայտնաբերվել է նաև օմիկրոն տարբերակի BA.2 ենթատարբերակը
«Հունվարի սկզբից մեկնարկած նոր կորոնավիրուսային հիվանդության 5-րդ ալիքն աստիճանաբար մարում է, ինչի մասին վկայում են «Հերացի» վերլուծական կենտրոնի կողմից պարբերաբար մշտադիտարկվող ցուցանիշները:
Մասնավորապես, սույն թվականի փետրվարի 2-ից հետո, երբ արձանագրվել էր Covid 19 առավելագույն օրական դեպքերը՝ 4388, փաստացի բուժման մեջ գտնվող պացիենտների թիվը կրճատվել է 2.1 անգամ, իսկ վարակի տարածվածության և հայտնաբերման համար կարևոր նշանակություն ունեցող կատարված թեստավորումների և դրական դեպքերի հարաբերության ցուցանիշը նվազել մինչև 13.4%, փետրվարի 2-ի 45.7%-ի փոխարեն:
Որոշակի լարվածության թուլացում է արձանագրվում նաև նոր կորոնավիրուսային հիվանդությամբ պացիենտներին սպասարկող «Միքայելյան» համալսարանական հիվանդանոցի Covid 19-ը բաժանմունքում, որտեղ բուժվող պացիենտների թիվը վերջին 10 օրերին կրճատվել է շուրջ 16%-ով:
Միևնույն ժամանակ, վարակը շարունակում է մնալ հանրային առողջության լուրջ մարտահրավեր՝ հանգեցնելով մարդկային կորուստների՝ հատկապես տարեցների շրջանում, հետևաբար հակահամաճարակային պարզ կանոններին հետևելը, պատվաստումներից չխուսափելը շարունակում է մնալ հիվանդության ծանր և անդառնալի դեպքերի կանխարգելման լավագույն միջոցը», – գրել է Մուրադյանը:
