Ավստրալիայում ավագ դպրոցի ավարտական քննությունները և ATAR համակարգը շարունակում են մնալ աշակերտների և ընտանիքների ուշադրության կենտրոնում։ 2025-ի դեկտեմբերին տարբեր նահանգներում ATAR-ի արդյունքները հրապարակվում են տարբեր օրերին․ Վիկտորիայի աշակերտները առաջինն են ստանում իրենց միավորները, հետո՝ մյուս նահանգները։ ATAR-ը (Ավստրալիայի բարձրագույն կրթության ընդունելության միավոր) աշակերտների գնահատման համակարգ է, որի միջոցով նրանք մրցում են իրենց հասակակիցների հետ՝ ընդունվելու համալսարան։ Հաշվարկը հիմնվում է տարբեր առարկաների վրա և արտացոլում է աշակերտի դիրքը՝ 0-ից 99.95 սանդղակում։ Այս միավորը անհրաժեշտ է որոշ համալսարաններում, սակայն վերջին տարիներին դրա ազդեցությունը նվազում է։
Հետազոտությունները ցույց են տալիս, որ 2023-ին ավագ դպրոցի ավարտածների միայն 63%-ն է ընդունվել համալսարան՝ բացառապես ATAR-ի հիման վրա, իսկ 30%-ը՝ առանց ATAR-ի։ Տարբեր համալսարաններ և մասնագիտություններ տարբեր կերպ են օգտագործում այս համակարգը․ ինժեներիա և բնական գիտություններում ATAR-ը դեռ կարևոր է, իսկ արվեստի, կրթության և գյուղատնտեսության ոլորտներում այլընտրանքային ուղիները գերակայում են։ Սոցիալ-տնտեսական գործոններն ու տարածաշրջանային տարբերությունները նույնպես մեծ ազդեցություն ունեն։ Շատ ուսանողներ ընտրում են արհեստավորական կրթություն, վոկացիոն ուսուցում կամ անմիջապես աշխատանքի անցնել։
Մասնագետներն ընդգծում են՝ ATAR-ը չի սահմանում աշակերտի ամբողջական ներուժը, և այսօր կան բազմաթիվ այլ ճանապարհներ՝ բարձրագույն կրթություն ստանալու համար։ Այս փոփոխվող իրականության պայմաններում կարևոր է, որ ուսանողները և ընտանիքները հստակ պատկերացնեն իրենց հնարավորությունները և չզգան սահմանափակում միայն ATAR-ի պատճառով։