Երեւանում աղբատար «Կամազ» մակնիշի ավտոմեքենաներից մեկը, որոնք վերջերս են ներկրվել քաղաքապետարանի կողմից, մխրճվել է ասֆալտի մեջ:
Երեւանի Դավթաշեն վարչական շրջանում ասֆալտը ջարդվել է, ինչի հետեւանքով Երեւանի քաղաքապետարանի աղբատար մեքենան հայտնվել է փոսի մեջ:
Երեւանի քաղաքապետի մամուլի խոսնակ Հակոբ Կարապետյանը, news.am-ի հետ զրույցում անդրադառնալով լուրերին, որ 5 կամազներից երեք խափանված են, նշեց, որ բոլոր 5 «ԿԱՄԱԶ»-ներն էլ այս պահին աշխատում են ծանրաբեռնված ռեժիմով. «Հասկանալի է, որ նման աշխատանքի ընթացքում չեն բացառվում չնախատեսված իրավիճակներ»:
Քաղաքապետարանի լրատվության վարչության պետ Իոսիֆ Կուբատյանն էլ նշեց, որ իսկապես, մի դեպքում՝ աղբատարի անիվը, որ խրվել էր ասֆալտի մեջ, դուրս է բերվել եւ հիմա նորմալ աշխատում է, մյուս դեպքում էլ «Կամազ»-ն իսկապես վթարի է ենթարկվել, բայց ոչ իր մեղքով. «Կամազները» բոլորը աշխատանքի մեջ են:
