Հոլիվուդյան դերասանուհի Ամանդա Սեյֆրիդը բրիտանական GQ-ին տված հարցազրույցում անդրադարձել է իր անվտանգությանը վերաբերող մտահոգություններին։ Նա հայտնել է, որ 2025 թվականի սեպտեմբերին կոնսերվատիվ ակտիվիստ Չարլի Քըրքի սպանությունից հետո ստիպված է եղել թիկնապահ վարձել՝ իր հասցեին հնչած սպառնալիքների և համացանցային հարձակումների պատճառով։
Սկանդալը ծագել է այն բանից հետո, երբ Սեյֆրիդը Instagram-ում մեկնաբանել էր Քըրքի ելույթների տեսանյութը՝ նրան անվանելով «ատելություն սերմանող» (hateful)։ Այս գրառումը, որը հաջորդել էր Յուտայի հովտային համալսարանում Քըրքի սպանությանը, առաջացրել էր նրա կողմնակիցների զայրույթը։ Ի պատասխան՝ դերասանուհին հայտարարել էր, որ չնայած դատապարտում է Քըրքի սպանությունը, սակայն չի հրաժարվում իր քաղաքական գնահատականներից։ «Ես կարող եմ զայրանալ միզոգինիայի և ռասիստական հռետորաբանության վրա, բայց միևնույն ժամանակ համաձայնել, որ սպանությունը սարսափելի է»,- նշել էր նա։
Սեյֆրիդը հրաժարվել է ներողություն խնդրել իր խոսքերի համար՝ ընդգծելով, որ իր մեկնաբանությունը հիմնված է եղել ակտիվիստի իրական հայտարարությունների վրա։ «Այսօր կա վախի, ատելության և ոչնչացնելու իմպուլսիվ ցանկության մեծ ալիք»,- ասել է դերասանուհին՝ հավելելով, որ այս միջադեպը ցույց է տալիս, թե որքան դժվար է դարձել հանրային անձանց համար քաղաքական կարծիք հայտնելը ժամանակակից բևեռացված հասարակության մեջ։