Կարլո Անչելոտին և նրա Ռեալ Մադրիդ թիմը պատրաստ են իրենց երկրորդ տիտղոսը նվաճել այս մրցաշրջանում՝ չորեքշաբթի երեկոյան հանդիպելով Պաչուկայի հետ ՖԻՖԱ միջմայրցամաքային գավաթի խաղում։ Դոհայում, Կատարում անցկացվող միջոցառման նախաշեմին իտալացի մարզիչը մամուլի ասուլիսում անդրադարձել է թիմի իրավիճակին, իր անձնական նվաճումներին և Կիլիան Մբապեի ֆիզիկական վիճակին։
Պատասխանելով թիմի հանդերձարանը տիրապետելու վերաբերյալ հարցին՝ Անչելոտին վստահությամբ մերժեց այդ պնդումները։ «Հարցնում եք՝ կորցրե՞լ եմ հսկողությունը (ծիծաղում է)։ Դժվար հարց է… Ես դա չեմ կորցրել, իհարկե ոչ։ Ֆուտբոլում միշտ լինում են դժվար պահեր, դա միշտ է եղել։ Երբեմն դրանք լինում են հոկտեմբեր-նոյեմբեր ամիսներին, երբեմն՝ ապրիլ-մայիսին»,- ասաց նա։
Անչելոտին կարևորեց նման պահերին հետևողականությունը։ «Կարևորն այն է, որ լինես այնտեղ և շարունակես։ Եթե դա լինում է հոկտեմբեր-նոյեմբերին, դեռ հնարավորություն կա վերականգնվելու, և մենք հենց դա էլ անում ենք։ Համոզված եմ, որ մրցաշրջանի երկրորդ հատվածում մենք շատ մրցունակ կլինենք։ Ես կարող եմ վստահեցնել՝ հսկողությունը չեմ կորցրել»,- ավելացրեց նա։
Միգել Մունյոսին գերազանցելու և «Ռեալ Մադրիդի» պատմության ամենատիտղոսակիր մարզիչ դառնալու հնարավորության վերաբերյալ հարցին իտալացին հպարտությամբ և վճռականությամբ պատասխանեց։ «Իհարկե, սա կարևոր է՝ նման հաջողության հասնել։ Սա վկայում է, որ ես լավ աշխատանք եմ կատարել։ Կարծում եմ՝ ես դա արել եմ, բայց ուզում եմ շարունակել։ Պատիվ է համեմատվել Միգել Մունյոսի և աշխարհի ամենամեծ ակումբը ղեկավարելու բախտ ունեցած մյուս մարզիչների հետ»,- նշեց Անչելոտին։
Կիլիան Մբապեի վիճակի վերաբերյալ Անչելոտին ներկայացրեց լավատեսական մանրամասներ։ Չնայած վնասվածքին, ֆրանսիացի հարձակվողը ուղևորվել է Կատար, ինչը հարցեր է առաջացրել նրա խաղադաշտ դուրս գալու հնարավորության մասին։ «Դա պարզ է․ երեկ նա լավ մարզվեց, լավ զգացումներ ուներ։ Նա վազքեր կատարեց, ամեն ինչ լավ էր։ Այսօր կարևոր մարզում է, որտեղ կգնահատենք զգացումները և ռիսկը։ Եթե նա լավ լինի, բժիշկների հետ խոսելուց հետո, նա կխաղա։ Եթե նույնիսկ փոքր ռիսկ լինի, իհարկե՝ ոչ։ Բայց երեկվա զգացումները շատ լավ էին։ Մենք լավատես ենք»,- ասաց մարզիչը։
«Ռեալ Մադրիդի» երկրպագուները անհամբերությամբ սպասում են Մբապեի խաղադաշտ դուրս գալուն և Անչելոտիի վստահության հերթական տիտղոսի վերածվելուն։
