Հուլիսի 28-ին Sputnik Արմենիայի հետ զրույցում Գեղարքունիքի մարզպետ Գնել Սանոսյանը հայտնել է, որ Գեղարքունիքում հակառակորդի հետ փոխհրաձգության հետևանքով անհետ կորած զինծառայողը գտնվել է։
Սանոսյանը նշել է, որ զինծառայողը ծայրահեղ ծանր վիճակում է, նոր տեղափոխվել է Երևան։
Մարզպետի խոսքով՝ վիրավոր զինծառայողը եղել է դիրքի շրջակայքում, այդ պատճառով էլ սկզբում կարծել են, թե նա անհետ կորած է։
Սանոսյանը տեղեկացրել է նաև, որ մյուս երեք զինծառայողների վիճակը բավարար է, նրանք բոլորը բուժում են ստանում այժմ Երևանի Կենտրոնական զինվորական հոսպիտալում (Մուրացան)։ Բոլոր զինծառայողներն էլ ժամկետային են և շարքային։
