Տեղեկատվական տեխնոլոգիաների ոլորտի զարգացմանը նպաստելու և ոլորտում նոր աշխատատեղերի ստեղծումը խթանելու նպատակով ընթացիկ տարվա հուլիսի 22-ին ԱՀ Ազգային Ժողովի կողմից ընդունվել են «Տեղեկատվական տեխնոլոգիաների ոլորտի պետական աջակցության մասին», ««Շահութահարկի մասին» օրենքում լրացումներ կատարելու մասին» և ««Եկամտային հարկի մասին» օրենքում լրացումներ կատարելու մասին» օրենքները, համաձայն որոնց ընթացիկ տարվա սեպտեմբերի 1-ից տեղեկատվական ոլորտում գործունեություն իրականացնող ընկերություններին տրամադրվելու են արտոնություններ` երկու ուղղություններով:
Այս մասին տեղեկացնում է ԱՀ ֆինանսների նախարարության մամլո ծառայությունը:
Աղբյուրի հաղորդմամբ՝ առաջինը վերաբերում է պետական աջակցության ծրագրերին և ներառում է ներդրումային ծրագրերը, դրամաշնորհներն ու տեխնիկական աջակցությունը, իսկ երկրորդը` հարկային արտոնությունների տրամադրումն է:
Մասնավորապես, ոլորտում գործունեություն իրականացնող կազմակերպությունները մինչև 2029թ. հունվարի 1-ը կազատվեն շահութահարկից, իսկ աշխատավարձից եկամտային հարկը կհաշվարկեն 5 տոկոս դրույքաչափով: Արտոնությունից օգտվելու նպատակով ընկերությունները պետք է ստանան հավաստագիր, որը տրամադրվելու է կառավարության որոշմամբ ձևավորված հանձնաժողովի կողմից` օրենքով նախատեսված պահանջներին բավարարելու դեպքում: Ոլորտում հարկային արտոնություններ նախատեսող օրենսդրական փոփոխություններին կարող եք ծանոթանալ այստեղ: