Երևանի քաղաքապետ Հրաչյա Սարգսյանն այսօրվա գործակարգավարական նիստի ընթացքում մի շարք հանձնարարականներ տվեց՝ խոսելով աղբի տեսակավորման մասին:
Թափոնների տեսակավորման գործընթացը մայրաքաղաքում առավել արդյունավետ կազմակերպելու նպատակով կավելացվեն աղբի տեսակավորման աղբամանները: Քաղաքապետը հանձնարարեց աշխատանքները մեկնարկել Դավթաշեն վարչական շրջանից՝ առկա բոլոր աղբամանների կողքին տեղադրելով նաև տեսակավորման թափոնամաններ:
«Դավթաշեն վարչական շրջանի ղեկավար, այդ մասով խնդրում եմ ուսումնասիրեք, հայտ ներկայացրեք, որ այդ աղբամանները ձեռք բերենք: Պետք է նաև ուսումնական լուրջ աշխատանք իրականացնել, որպեսզի ունենանք պիլոտային լավ վարչական շրջան, որտեղ աղբի տեսակավորումն ամբողջությամբ իրականացվում է»,- ասաց քաղաքապետը:
Սարգսյանը խոստովանեց, որ զուտ տեխնիկական պատճառներով ինքը աղբի տեսակավորում չի իրականացնում:
«Մեր բնակության հասցեին մոտ տարածքում աղբի տեսակավորման արկղ չկա»,- ասաց նա: