Վերաքննիչ քրեական դատարանում` Արսեն Նիկողոսյանի նախագահությամբ, այսօր տեղի ունեցավ ԵԿՄ վարչության նախկին նախագահ, ԱԺ նախկին պատգամավոր Մանվել Գրիգորյանին գրավով ազատ արձակելու որոշման դեմ ՀՀ գլխավոր դատախազության վերաքննիչ բողոքի քննությունը:
Գրիգորյանի պաշտպան Արսեն Մկրտչյանը լրագրողներին տեղեկացրեց, որ նիստը հետաձգվել է, պատճառները զուտ տեխնիկական են` որոշակի փաստաթղթերի տրամադրման անհրաժեշտություն կա՝ միջնորդություն պատրաստելու, ներկայացնելու համար: Լրագրողները հետաքրքրվեցին՝ ինչո՞ւ նիստին ներկա չէր Մանվել Գրիգորյանը:
«Պարոն Գրիգորյանի առողջական վիճակը լավ չի եղել, դրա համար չի մասնակցել, բայց նա ցանկություն հայտնել է: Եթե առողջությունը ների, անպայման կմասնակցի»,- ասաց նա:
Մկրտչյանը նշեց, որ Գրիգորյանին կալանքի տակ պահելու անհրաժեշտությունը վերացել է, դատարանը հնարավոր է գտել, որ կալանքը փոխարինվի գրավով: Նա արձագանքեց նաև Գրիգորյանին գրավով ազատ արձակելու որոշման դեմ անցկացվող ակցիաներին:
«Չէր կարող նիստը կայանալ այս պայմաններում, սա ճիշտ մոտեցում չէ, live-եր են մտնում, պայքարում բառացիորեն արդարադատության դեմ»,- նշեց Մկրտչյանը:
Գրում է shantnews.am-ը։