ՀԱՊԿ նոր գլխավոր քարտուղարի հարցը պետք է լուծվի մինչև տարեվերջ։ Այս մասին հայտնել է Բելառուսի նախագահի խոսնակ Նատալյա Էյսմոնտը:
Հինգշաբթի, Բելառուսի նախագահ Ալեքսանդր Լուկաշենկոն Եվրասիական բարձրագույն տնտեսական խորհրդի նիստից հետո լրագրողների հետ զրույցում հայտարարել էր, որ կա պայմանավորվածություն ՀԱՊԿ գլխավոր քարտուղարի նշանակման մեխանիզմների վերաբերյալ եւ որ այդ պաշտոնը կարող է զբաղեցնել Բելառուսի ներկայացուցիչը: Մինչդեռ ՌԴ մամուլի խոսնակ Դ. Պեսկովը նշել էր, որ գլխավոր քարտուղարի վերաբերյալ հարցը դեռեւս հստակեցված չէ:
«Պետությունների ղեկավարների, այդ թվում՝ Ռուսաստանի նախագահի կողմից միանշանակորեն որոշված է այն, որ այս հարցը պետք է լուծվի մինչև նոր 2019 թվականը»,- հայտարարել է Էյսմոնտը՝ «Բելառուս-1» հեռուստաալիքին տված հարցազրույցում:
Լուկաշենկոյի խոսնակը նաև նշել է, որ Եվրասիական բարձրագույն տնտեսական խորհրդի նիստի շրջանակում այդ թեմայի քննարկումը եղել է «ոչ թե բուռն, այլ շատ բուռն»: Նրա խոսքով՝ կրքերն այնպես են բորբոքվել, որ արդեն վերջում «բոլորը բոլորի առաջ ստիպված են եղել ներողություն խնդրել»:
ԽՈՐՀՈւՐԴ Է ՏՐՎՈւՄ ԿԱՐԴԱԼ
