Bluesky սոցիալական ցանցը, որն այս շաբաթ զգալի աճ է գրանցել օգտատերերի թվով, հայտարարել է, որ «ոչ մի մտադրություն չունի» օգտագործելու օգտատերերի բովանդակությունը գեներատիվ արհեստական բանականության (ԱԲ) գործիքների մարզման համար։ Այս հայտարարությունը կատարվել է այն օրը, երբ X (նախկինում՝ Twitter) հայտարարեց իր նոր օգտագործման պայմանների մասին, որոնք թույլ են տալիս օգտագործել հրապարակային գրառումները ԱԲ մոդելների մարզման համար։
«Մի շարք նկարիչներ և ստեղծագործողներ իրենց հանգրվանն են դարձրել Bluesky-ը, և մենք լսում ենք նրանց մտահոգությունները՝ կապված այլ հարթակների կողմից իրենց տվյալների օգտագործման հետ»,- նշված է Bluesky-ի հայտարարության մեջ։ «Մենք չենք օգտագործում ձեր բովանդակությունը գեներատիվ ԱԲ-ի համար և ոչ մի մտադրություն չունենք դա անելու»։
Ընկերությունը նշել է, որ ԱԲ-ն օգտագործվում է միայն ներքին նպատակներով՝ բովանդակության վերահսկման և «Discover» ալգորիթմիկ լրահոսում։ Սակայն, ըստ Bluesky-ի, այս համակարգերից ոչ մեկը չի մարզվում օգտատերերի բովանդակությամբ։
Մյուս կողմից, X-ը, որը պատկանում է Իլոն Մասկին, բացատրել է, որ հարթակում գրառումներ կատարելը ընկերությանը իրավունք է տալիս «վերլուծել տեքստը և այլ տեղեկատվությունը»՝ այդ թվում՝ ԱԲ մոդելների մարզման նպատակներով։
Bluesky-ն հայտնել է, որ վերջին 24 ժամում ավելի քան 1 միլիոն նոր օգտատեր է միացել հարթակին՝ ներկա պահին ունենալով 17.14 միլիոն օգտատեր։ Չնայած այս աճին, Meta-ի Threads-ը շարունակում է մնալ X-ի հիմնական մրցակիցը՝ ունենալով ավելի քան 275 միլիոն ամսական ակտիվ օգտատեր։
ԽՈՐՀՈւՐԴ Է ՏՐՎՈւՄ ԿԱՐԴԱԼ
