Այսօր ուժի մեջ է մտնում բռնության կոչերը քրեականացնող օրենքը։ Այս մասին Facebook-ի իր էջում գրառման միջոցով տեղեկացրել է ՀՀ ԱԺ «Իմ քայլը» խմբակցության պատգամավոր Սարգիս Խանդանյանը։
«Հույս ունեմ, որ այս օրենքը շուտով կդառնա կանխարգելող նշանակություն ունեցող գործիք, և ոչ պատժիչ։ Լինենք ավելի հանդուրժող միմյանց և այլոց նկատմամբ։ Բռնության արդարացումը և քարոզը այսուհետ բերելու է ոչ միայն անցանկալի լարվածության և հանրային հարաբերությունների խաթարման, այլև շատ կոնկրետ քրեական պատասխանատվության», – գրել է Խանդանյանը։
Նա նաև ներկայացրել է, թե ինչպես է շարադրված Քրեական օրենսգրքի համապատասխան հոդվածը։
«Հոդված 226.2. Բռնություն գործադրելու հրապարակային կոչերը, բռնությունը հրապարակայնորեն արդարացնելը կամ քարոզելը
1. Անձի կամ անձանց խմբի նկատմամբ սեռով, ռասայով, մաշկի գույնով, էթնիկական կամ սոցիալական ծագումով, գենետիկական հատկանիշներով, լեզվով, կրոնով, աշխարհայացքով, քաղաքական կամ այլ հայացքներով, ազգային փոքրամասնությանը պատկանելությամբ, գույքային վիճակով, ծնունդով, հաշմանդամությամբ, տարիքով կամ անձնական կամ սոցիալական բնույթի այլ հանգամանքներով պայմանավորված բռնություն գործադրելու հրապարակային կոչերը, նման բռնությունը հրապարակայնորեն արդարացնելը կամ քարոզելը, եթե բացակայում են սույն օրենսգրքի 225-րդ հոդվածի 4-րդ մասով, 226-րդ, 226.1-ին, 301-րդ, 385-րդ, 397.1-ին հոդվածներով նախատեսված հանցագործությունների հատկանիշները՝
պատժվում են տուգանքով՝ նվազագույն աշխատավարձի հիսնապատիկից հարյուրհիսնապատիկի չափով, կամ կալանքով՝ առավելագույնը երկու ամիս ժամկետով, կամ ազատազրկմամբ՝ առավելագույնը մեկ տարի ժամկետով:
2. Սույն հոդվածի 1-ին մասով նախատեսված արարքները, որոնք կատարվել են՝
1) մի խումբ անձանց կողմից նախնական համաձայնությամբ կամ կազմակերպված խմբի կողմից.
2) պաշտոնեական դիրքն օգտագործելով՝
պատժվում են տուգանքով՝ նվազագույն աշխատավարձի հարյուրհիսնապատիկից երեքհարյուրապատիկի չափով, կամ կալանքով՝ երկուսից երեք ամիս ժամկետով, կամ ազատազրկմամբ՝ մեկից երեք տարի ժամկետով՝ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ մեկից երեք տարի ժամկետով կամ առանց դրա», – ավարտել է գրառումը պատգամավորը:
https://www.facebook.com/khandanyansargis/posts/158441172353147?__xts__%5B0%5D=68.ARDIDySK5kCwxb7ZMXM0ia0j7roKF4n-VI4PCEURIBm3CNLiwt5uq2V4DidG7dL64y7M12VJltXtH5wR9a2hgqwoDuTOJnbAv5j-mVwD8Gjc0cddrR4xNEyzaUNSQ706EnCP5Lok4AKvXlw9wLuAP1_l4sOwuqjdyTNx-zZa3Gg7TW4hsjO5qRzDRT-m5xCh3WwsS-n78DOa0Il4ExzXI00cyGyN3vrOoL1O6JidAffOW1x1J5nZam4P7K-GnsfiDxKbHtgTU6184WNIIwYLlrwJEtop9U32UlpiaKvYe1KI77_WLgZ08vaaje0P5-iUoQnIiJJMdpAFeOirUv8&__tn__=-R