Հայաստանում արգանդի պարանոցի քաղցկեղը տարեկան 260-265 նոր դեպք է արձանագրվում, որոնց մեծ մասը պայմանավորված է Մարդու պապիլոմավիրուսի (ՄՊՎ) քաղցկեղածին տեսակներով։ Այս հիվանդությունը կանխարգելելի է, և ՀՀ Առողջապահության նախարարությունը կարևորում է պատվաստման և սքրինինգի դերը հիվանդության դեմ պայքարում։
Արգանդի պարանոցի քաղցկեղի դեմ պատվաստումը՝ որպես առաջնային կանխարգելում, ընդգրկված է Հայաստանի Հանրապետության պատվաստումների ազգային օրացույցում։ 2023-2024 թվականներին նկատվել է թիրախային խմբերում ՄՊՎ-ի դեմ պատվաստումներում ընդգրկվածության ցուցանիշների բարելավում, ինչը խոսում է հանրության իրազեկվածության աճի մասին։
Արգանդի պարանոցի քաղցկեղը կանխարգելելու համար անհրաժեշտ է հետևել մի քանի պարզ քայլերի.
- Պատվաստվե՛ք ՄՊՎ-ի դեմ. Պատվաստումը հանդիսանում է հիվանդության կանխարգելման ամենաարդյունավետ միջոցը։
- Անցե՛ք սքրինինգային հետազոտություն. Վաղ հայտնաբերումը հիվանդության հաջող բուժման գրավականն է։
- Անհրաժեշտության դեպքում ստացե՛ք համապատասխան բուժում. Ժամանակին սկսված բուժումը թույլ է տալիս հասնել լիարժեք ապաքինման։
Արգանդի պարանոցի քաղցկեղը հատկապես վաղ փուլում հայտնաբերելու և արդյունավետ բուժելու դեպքում հնարավոր է հասնել լիարժեք ապաքինման։ Կանանց առողջությունը պահպանելու համար կարևոր է լինել տեղեկացված և հետևել բժիշկների խորհուրդներին։
Այս հոդվածը նպատակ ունի ևս մեկ անգամ ընդգծել արգանդի պարանոցի քաղցկեղի կանխարգելման կարևորությունը և խրախուսել կանանց պատասխանատու վերաբերմունք դրսևորել սեփական առողջության նկատմամբ։ Ժամանակին իրականացված պատվաստումը և սքրինինգը կարող են փրկել բազմաթիվ կյանքեր։