Դանիայի թագավորական ընտանիքի անդամ, կոմս Նիկոլայը՝ թագուհի Մարգարետ II-ի ավագ թոռը, հունիսին թողարկված քառամաս վավերագրական ֆիլմում անկեղծորեն պատմել է իր կյանքի դժվարին փուլերի և թագավորական պարտականություններից հեռանալու մասին։ 26-ամյա Նիկոլայը առաջին անգամ հրապարակայնորեն անդրադարձել է 2022 թվականին ընդունված այն որոշմանը, որով ինքը և իր երեք քույր-եղբայրները զրկվեցին արքայազնի և արքայադստեր տիտղոսներից։
Ինչպես հաղորդում է Hola-ն, Նիկոլայը այդ փորձառությունը նկարագրել է որպես «աքսորի» զգացողություն։ «Ամեն ինչ փոխվեց ինձ համար։ Որոշումը կայացվել էր իմ փոխարեն, և դա, իհարկե, հաճելի չէր», – նշել է նա։ Այնուամենայնիվ, կոմսը ընդգծել է, որ չի ցանկանում իրեն զոհ զգալ և փորձում է դրական տեսանկյունից նայել իրավիճակին՝ կենտրոնանալով սեփական ուղին գտնելու վրա։
Վավերագրական ֆիլմում Նիկոլայը նաև խոսել է այն ճնշումների մասին, որոնք ուղեկցել են իրեն մանկուց։ Նա առանձնացրել է իր 18-ամյակը՝ որպես հրապարակային կյանքի ծանրաբեռնվածության վառ օրինակ, երբ անձնական տոնակատարության փոխարեն ստիպված է եղել դիմակայել լրատվամիջոցների և հանրության ուշադրությանը։ Ըստ Նիկոլայի՝ Հերլուֆսհոլմ գիշերօթիկ դպրոցում սովորելու տարիներին նույնպես իր համար դժվար է եղել հաղթահարել մարդկանց կանխակալ կարծիքները։
Այժմ Նյու Յորքում բնակվող Նիկոլայը կենտրոնացած է մոդելային կարիերայի վրա, որը նա սկսել էր դեռ մանկուց։ Չնայած ծնողների՝ արքայազն Յոահիմի և Ալեքսանդրա, Ֆրեդերիկսբորգի կոմսուհու սկզբնական զգուշավորությանը, այսօր նա ավելի մեծ անկախություն է վայելում՝ կառուցելով իր մասնագիտական ուղին թագավորական պաշտոնական պարտականություններից դուրս։