Այսօր մամուլի ասուլիս են հրավիրել դատապարտյալ Արթուր Հովհաննիսյանի հարազատներն ու պաշտպանը: Նրանք պատմել են այն մասին, որ Արթուր Հովհաննիսյանը դատապարտվել է ՀՀ Քրեական օրենսգրքի երկու հոդվածով` թմրամիջոցներ ապօրինի պատրաստելու և պահելու, նաև շորթման մեղադրանքներով:
Առաջին մեղադրանքով արդարացման դատավճիռ է կայացրել ընդհանուր իրավասության դատարանը, որն անփոփոխ է թողել Վերաքննիչ դատարանը, իսկ երկրորդ մեղադրանքով նախատեսված 6 տարի պատժաչափի կեսն արդեն կրել է և համաներմամբ պետք է ազատվի: Սակայն արդարացման դատավճիռը պետական մեղադրողը բողոքարկել է Վճռաբեկ դատարան: Դա նշանակում է, որ դատապարտյալը ևս 3-4 ամիս պիտի մնա քրեակատարողական հիմնարկում:
Մինչդեռ, հարազատների ու պաշտպանների հավաստիացմամբ, դատապարտյալն ունի լուրջ առողջական խնդիրներ և չի ստանում պատշաճ բուժօգնություն:
SHANTNEWS.am-ը կապ է հաստատել նաև Քրեակատարողական վարչության հանրային կապերի վարչության պետ Նոնա Նավիկյանի հետ: Նա տեղեկացրեց, որ «Արմավիր» քրեակատարողական հիմնարկում գտնվող Արթուր Հովհաննիսյանը մի քանի անգամ ստացել է պատշաճ բուժօգնություն քաղաքացիական հիվանդանոցներում: Ավելի ընդարձակ տեղեկություն տրամադրել կարող են միայն այն դեպքում, եթե լինի դատապարտյալի գրավոր համաձայնությունը: