ՀՀ առողջապահության նախարարության «ՁԻԱՀ-ի կանխարգելման հանրապետական կենտրոն»-ի 75 մասնագետ աշխատանքից ազատման դիմում է գրել: Աշխատակիցները չեն ցանկանում միանալ «Նորք» ինֆեկցիոն կլինիկական հիվանդանոցին և դրա իրագործման արդյունքում դառնալ անցանկալի հետևանքների կրողը: Աշխատանքից ազատման կոլեկտիվ դիմումը նրանք հրապարակել են կենտրոնի Facebook-ի էջում՝ կից ներկայացնելով անձնակազմի ներկայացուցիչների ստորագրությունները:
Հայտարարության մեջ նշված է, որ որոշումը կայացրել են՝ ելնելով կենտրոնի շուրջ ծավալվող իրադարձություններից, առերեսվելով, որպես մասնագետներ, արհամարհված լինելու փաստին, չհանդուրժելով ԱՆ-ի, նրանց կողմից նշանակված տնօրենի պաշտոնակատարի և ԱՆ-ի կողմից ուղարկվող այլ անհատների կողմից կիրառվող ճնշումները:
Նրանք այսպիսով ևս մեկ անգամ հայտնել են իրենց անհամաձայնությունը, որ կենտրոնը «Նորք» ինֆեկցիոն կլինիկական հիվանդանոցին միացվի:
«Մենք՝ «ՁԻԱՀ-ի կանխարգելման հանրապետական կենտրոն» ՊՈԱԿ-ի ներքոստորագրյալ աշխատակիցներս, ներկայացնում ենք աշխատանքից ազատման դիմում՝ թողնելով ստեղծված իրավիճակի ողջ պատասխանատվությունը ՀՀ առողջապահության նախարարության վրա»:
Նշենք, որ հիմնարկությունում աշխատում է 108 հոգի: Այսօր լրագրողների հետ զրույցում կենտրոնի համաճարակաբանական հսկման բաժնի վարիչ Արշակ Պապոյանը նշել է, որ 75-ը դեռևս վերջնական թիվ չէ, այն կարող է ավելանալ:
https://www.facebook.com/AIDScenterRA/posts/1479409495574610?__xts__[0]=68.ARAzkxNkFLQpbRRuxMtMMNxtJ_j0sXdMJuL6Mq-5f3TmS7fDcNncAtfZyxzGp3rpVelc3Tv4z-f00ZMSywMG8NeKBhEBjCzmdDqbB200LAdCQeSmL3DH5CLhgF2CH1SmbDccrwLXQC86tJsoVIk_3Mf-rmnWJJw5XWzWtfLcEnYlbq0sVAAB9WZ6pMy1WK6hgdy4klc57MQSbsT9evhPosA-d-nI9WXnj1u79xbdN8kQNJAixFgjN1wuPWLKiO1aOANKmAhBE0HH-xT7ESrQOp0ku1mr_r55ndT5op7Av19_nF_8m6ZBEuK0XdfnJgKapoQqdds_IoWzr4vEI3MKuBoNuQ&__tn__=-R
Հիշեցնենք, որ օրերս առողջապահության նախարար Արսեն Թորոսյանի հրամանով աշխատանքից ազատվել է այդ կենտրոնի տնօրենը՝ հանձնարարականները չկատարելու հիմնավորմամբ՝ երկու ծառայությունների միավորումը և փաստաթղթերի տրամադրումը:
Ավելի ուշ այս կենտրոնի աշխատակիցները բողոքի ակցիա էին իրականացնում ՀՀ կառավարության դիմաց: Նրանք նշում էին, որ 2 կենտրոնների միացման դեպքում կունենանք անկառավարելի վարակ, մեծ թվով պացիենտներ և անպատրաստ համակարգ:
