Ֆրանսիայի նախագահի նստավայրում՝ Ելիսեյան պալատում, բացահայտվել է ճենապակյա սպասքի գողության դեպք։ Ֆրանսիական Le Figaro թերթի հաղորդմամբ, սեղանապետ Թոմաս Մ.-ն երկու տարի շարունակ հափշտակել է Սևրի ճենապակուց պատրաստված շուրջ հարյուր կտոր սպասք՝ ներառյալ գավաթներ, ափսեներ և այլ առարկաներ, որոնք գնահատվում են տասնյակ հազարավոր եվրո։ Գողացված իրերը մշակութային ժառանգության մաս են կազմում։
Աշխատակիցը կեղծել է գույքագրման փաստաթղթերը՝ կորուստները թաքցնելու նպատակով։ Գողացված իրերը նա փոխանցել է ճենապակու կոլեկցիոներ Ժիսլեն Մ.-ին, ով աշխատել է որպես Լուվրի սրահներից մեկի հսկիչ։ Դատարանը պարտավորեցրել է երկու մեղադրյալներին վերադարձնել գողացված գույքը։ Կոլեկցիոներին արգելվել է աշխատել Լուվրում, իսկ սեղանապետը հեռացվել է Ելիսեյան պալատում իր պաշտոնից։