ԵՄ արդարադատության հարցերով հանձնակատար Մայքլ ՄըքԳրաթը Politico-ին տված հարցազրույցում նշել է, որ Ուկրաինան պետք է ապացուցի, որ ունի հուսալի համակարգ՝ կոռուպցիայի դեմ պայքարելու համար, եթե ցանկանում է միանալ Եվրամիությանը։ Նա ընդգծել է, որ թեկնածու երկրները պետք է ցուցադրեն արդյունավետություն՝ հետաքննությունների, քրեական գործերի և դատական գործընթացների հարցում։
ՄըքԳրաթը նաև անդրադարձել է Ուկրաինայի էներգետիկ ոլորտում կոռուպցիայի դեպքերին, որոնք կազմում են մոտ 100 միլիոն դոլար։ Այս գործի շրջանակում հետաքննիչները երեկ խուզարկել են Ուկրաինայի նախագահի խորհրդական Անդրեյ Երմակի գրասենյակը։ Զելենսկին, իր հերթին, աշխատանքից ազատել է Երմակին՝ հայտարարելով, որ չի հանդուրժի շահարկումներ։
Մինչդեռ ԵՄ-ն շարունակում է քննարկել Ռուսաստանի սառեցված ակտիվները Ուկրաինայի ֆինանսավորման համար օգտագործելու ծրագիրը։ ԵՄ դեսպան Կատարինա Մատերնովան նշել է, որ այս քայլը կարևոր ազդանշան կլինի Ուկրաինայի և Եվրոպայի համար՝ ցույց տալու, որ ԵՄ-ն շարունակում է աջակցել Ուկրաինային։