Իռլանդիան, Իսպանիան, Նիդեռլանդները և Սլովենիան պաշտոնապես հայտարարել են, որ բոյկոտելու են 2026 թվականի «Եվրատեսիլ» երգի մրցույթը։ Այս որոշումը պայմանավորված է Իսրայելի մասնակցության թույլտվությամբ, որը հարուցել է մի շարք երկրների դժգոհությունը։ Հիշեցնենք, որ այս երկրները կոչ էին անում բացառել Իսրայելին մրցույթից՝ Գազայի պատերազմի հետևանքների և քվեարկության անարդարության մեղադրանքների պատճառով։
Ժնևում կայացած ժողովի ընթացքում իսպանական RTVE հեռարձակող ընկերությունը առաջարկել էր գաղտնի քվեարկություն անցկացնել Իսրայելի մասնակցության հարցի շուրջ, սակայն այս առաջարկը մերժվել է։ Այս հանգամանքը, ըստ մասնակիցների, խորացրել է անվստահությունը մրցույթի կազմակերպիչների նկատմամբ։ Եվրոպական հեռարձակողների միության որոշումը, որը թույլ է տալիս Իսրայելին մասնակցել, առաջացրել է բուռն քննարկումներ և քննադատություններ։