ՀՀ վարչապետ Նիկոլ Փաշինյանը ֆեյսբուքյան ուղիղ եթերի ընթացքում նշեց, որ Ադրբեջանը հանդես է գալիս հայտարարություններով, որոնք դուրս են համատեղ հայտարարության շրջանակից։
«Ըստ էության, սա է պատճառը, որ հանդիպմանը հաջորդում են համատեղ հայտարարություններ, տվյալ դեպքում՝ ԵԱՀԿ ՄԽ համանախագահների և երկու երկրների ԱԳ նախարարների, որ ընդգծում են այն արդյունքները, որ կարողացել են համաձայնեցնել: Վերջին օրերին ադրբեջանական կողմը հանդես է գալիս հայտարարություններով, որոնք, ըստ էության, դուրս են համատեղ հայտարարության շրջանակից: Ես հարկ եմ համարում և կարևոր եմ համարում մի քանի պարզաբանում մտցնել՝ նաև բոլորիս ուշադրությունը հրավիրելով փաստի վրա, որ բանակցություններն արդյունավետ դարձնելու համար պետք է մոռանանք հին և կրկնվող տեքստերը, որ ցույց են տվել իրենց անարդյունավետությունը և պետք է առաջնորդվենք նոր մոտեցմամբ», – ասաց վարչապետը:
Փաշինյանը հիշեցրեց՝ Ստեփանակերտում Անվտանգության խորհուրդների համատեղ նիստում ասել էր, որ շատ կարևոր է Արցախի ներկայացուցիչների մասնակցությունը բանակցային գործընթացում:
«Ես ասել էի, նաև ասում եմ, որ սա բանակցությունների ֆորմատի փոփոխության պահանջ և ակնկալիք չէ, ո´չ էլ քմահաճույք, ո´չ էլ նախապայման, սա բանակցային գործընթացը արդյունավետ դարձնելու միջոց է: Ադրբեջանական կողմը շեշտում է՝ կարևոր է, որ բանակցային ֆորմատը մնացել է անփոփոխ, դրանով ուզում են ասել, որ այս քննարկումներից իրենք հաղթող են դուրս եկել. սա նախ` կոռեկտ չէ այն տրամաբանության շրջանակում, ինչ մենք արդեն իսկ պայմանավորվել ենք, այն է՝ չփնտրել հաղթողներ ու պարտվողներ:
Ես այն փաստի վրա եմ ուշադրություն հրավիրում, որ Ղարաբաղի մասնակցության հարց դնելով՝ բանակցային ֆորմատի փոփոխության հարց չենք դրել, ԵԱՀԿ ՄԽ համանախագահության ներքո բանակցության ֆորմատը կասկածի տակ չէ, որևէ կասկած չկա այդ ֆորմատի վերաբերյալ, հարցն այն է, թե ինչ է նշանակում այդ ֆորմատն ըստ էության», – ասաց նա: