Բրիտանացի երգիչ Էլթոն Ջոնը Roblox խաղում ստեղծել է իր վիրտուալ աշխարհը։ Այս մասին հայտնում է NME-ն։
Արտիստը ներկայացրել է իր աշխարհը՝ «Beyond the Yellow Brick Road»-ը։ Մակարդակը ներառում է ինտերակտիվ առաջադրանքներ՝ հիմնված Էլթոն Ջոնի հիթերի և վիկտորինայի վրա: Խաղում կներկայացվի նաև երեսվածքների հավաքածու՝ ոգեշնչված երգչի կերպարներով: Երկրպագուները կկարողանան իրենց ավատարի վրա փորձել ամբողջական հանդերձանք կամ առանձին իրեր Էլթոն Ջոնի զգեստապահարանից:
«Ես միշտ օգտագործել եմ իմ կերպարը, ակնոցն ու երաժշտությունը՝ արտահայտվելու համար, և Roblox-ն իսկապես խրախուսում է այդ ինքնադրսեւորումը: Հիմա իմ երկրպագուները կարող են անել նույնը, և դա հուզիչ է»,- կիսվել է կատարողը:
Վիրտուալ աշխարհում տեղի կունենա նաև Էլթոն Ջոնի 10 րոպեանոց համերգը, որտեղ կներկայացվեն արտիստի սիրելի ստեղծագործությունները: Ներկայացումը տեղի կունենա նոյեմբերի 17-ին և կկրկնվի յուրաքանչյուր ժամ մինչև նոյեմբերի 20-ը։
«Իմ կարիերայի յուրաքանչյուր փուլում ես միշտ ցանկացել եմ առաջ շարժվել և նայել ապագային: «Beyond the Yellow Brick Road»․ սա այդ ճանապարհի հաջորդ քայլն է», – ասել է երաժիշտը: Նա հավելել է, որ անհամբեր սպասում է երկրպագուների արձագանքին։