Սփյուռքի նախարարության աշխատակիցներն աշխատանքային սահմանված ընթացակարգով իրենց մտահոգություններն ու առաջարկությունները նախարարության լուծարման վերաբերյալ ներկայացրել են ՀՀ արդարադտության նախարարությանը, լրագրողների հետ ճեպազրույցում ասաց ՀՀ սփյուռքի նախարարի պաշտոնակատար Մխիթար Հայրապետյանը:
«Այս հարցի վերաբերյալ մենք ունենք մեր մտահոգությունները, որովհետև հստակ չի նշվում, թե այդ գործառույթները, որ գերատեսչությունն է ստանձնելու, հետևաբար դրա լուծարման վերաբերյալ քաղաքական թիմին էլ ենք հայտնել», – նշեց Հայրապետյանը:
Անդրադառանլով կառավարության կողմից շրջանառության մեջ դրված «Կառավարության կառուցվածքի ու գերծունեության մասին» ՀՀ օրենքում փոփոխություններ և լրացումներ անելու մասին նախագծին՝ նախարարի պաշտոնակատարը նշեց՝ վստահ է, որ փաստաթղթում փոփոխություններ կլինեն:
«Ես ինձ թույլ կտամ ասել, որ փաստաթղթում կլինեն փոփոխություններ՝ հիմնված թե մեր, թե մյուս նախարարությունների մտահոգությունների վրա», – ասաց նախարարի պաշտոնակատարը:
Նախագիծն առաջարկում է կրճատել նախարարությունների թիվը՝ դրանք 17-ից հասցնելով 12-ի և ի տարբերություն մնացած նախարարությունների՝ Սփյուռքի նախարարությունը չի միավորվում որևէ նախարարության հետ, այլ լուծարվում է:
